ന്യൂഡൽഹി: രാജ്യത്ത് വോട്ടർ പട്ടികയിൽ വ്യാപകമായി പേര് വെട്ടിമാറ്റിയെന്ന വിവാദത്തിൽ മുഖ്യ തിരഞ്ഞെടുപ്പ് കമ്മീഷണർ  ജ്യാനേഷ് കുമാറിനെതിരെ സുപ്രീം കോടതിയിൽ പൊതുതാൽപ്പര്യ ഹർജി. സ്പെഷ്യൽ ഇൻറൻസീവ് റിവിഷൻ (SIR) നടപടികളിലെ ക്രമക്കേടുകൾ ചൂണ്ടിക്കാട്ടി അഡ്വ. ശൈലേന്ദ്ര മണി ത്രിപാഠിയാണ് സുപ്രീം കോടതിയിൽ ഹർജി സമർപ്പിച്ചത്. വോട്ടർ പട്ടിക പരിഷ്കരണവുമായി ബന്ധപ്പെട്ട് തിരഞ്ഞെടുപ്പ് കമ്മീഷനുള്ളിൽ തന്നെ അതൃപ്തിയും ഭിന്നതയും നിലനിൽക്കുന്നതിനിടയിലാണ് ഈ നിർണായക നീക്കം.  
​ഹർജി നൽകിയത്: അഡ്വ. ശൈലേന്ദ്ര മണി ത്രിപാഠി (ഭരണഘടനയുടെ 32-ാം അനുച്ഛേദം അനുസരിച്ച്).  
​പ്രതിസ്ഥാനത്തുള്ളവർ: CEC ജ്യാനേഷ് കുമാർ, സീനിയർ ഡെപ്യൂട്ടി ഇലക്ഷൻ കമ്മീഷണർ മനീഷ് ഗാർഗ്, ഐ.ടി വിഭാഗം ഡി.ജി സീമ ഖന്ന.  
 മുഖ്യ തിരഞ്ഞെടുപ്പ് കമ്മീഷണർക്കെതിരെ ക്രിമിനൽ പ്രോസിക്യൂഷൻ, വിരമിച്ച സുപ്രീം കോടതി ജഡ്ജിയുടെ നേതൃത്വത്തിൽ എസ്‌ഐടി അന്വേഷണം, ഡിജിറ്റൽ ഡാറ്റാബേസിന്റെ ഫോറൻസിക് ഓഡിറ്റ്.  
​ഹർജിയിലെ പ്രധാന ആരോപണങ്ങൾ:
​ഭൂരിപക്ഷ അഭിപ്രായം മറികടന്നു: 2023-ലെ മുഖ്യ തിരഞ്ഞെടുപ്പ് കമ്മീഷണർ നിയമത്തിലെ സെക്ഷൻ 18 പ്രകാരം കമ്മീഷനിലെ ഭൂരിപക്ഷ അഭിപ്രായമാണ് നടപ്പിലാക്കേണ്ടത്. എന്നാൽ മറ്റ് രണ്ട് കമ്മീഷണർമാരായ സുഖ്ബീർ സിംഗ് സന്ധു, വിവേക് ​​ജോഷി എന്നിവരുടെ അനുമതിയില്ലാതെയാണ് CEC പല സുപ്രധാന തീരുമാനങ്ങളും എടുത്തതെന്ന് ഹർജി ആരോപിക്കുന്നു.  
​13 കോടി വോട്ടർമാരുടെ തിരോധാനം: രാജ്യത്തെ 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി എസ്‌ഐടി പരിശോധനയുടെ പേരിൽ ഏകദേശം 13 കോടിയോളം വോട്ടർമാരുടെ പേരുകൾ പട്ടികയിൽ നിന്ന് നീക്കം ചെയ്തതായി ഹർജി വ്യക്തമാക്കുന്നു.  
​ഫോം 6-ലെ അനധികൃത മാറ്റങ്ങൾ: പുതിയ വോട്ടർമാർക്ക് അപേക്ഷിക്കാനുള്ള 'ഫോം 6'-ൽ, മുൻകാല SIR വിവരങ്ങൾ നിർബന്ധമാക്കിക്കൊണ്ട് ECINet പോർട്ടലിൽ വരുത്തിയ മാറ്റങ്ങൾ നിയമവിരുദ്ധമാണ്. 'രജിസ്ട്രേഷൻ ഓഫ് ഇലക്ടേഴ്സ് റൂൾസ്, 1960' ഭേദഗതി ചെയ്യാതെയാണ് ഈ മാറ്റങ്ങൾ വരുത്തിയത്.  
​പശ്ചിമ ബംഗാളിലെ അപ്പീലുകൾ: വോട്ടർമാരെ ഉൾപ്പെടുത്തിയതിനെതിരെ പശ്ചിമ ബംഗാളിൽ തിരഞ്ഞെടുപ്പ് കമ്മീഷന്റെ പേരിൽ 16.10 ലക്ഷത്തോളം അപ്പീലുകൾ അനധികൃതമായി ഫയൽ ചെയ്യപ്പെട്ടുവെന്നും ഇതിന് പിന്നിലെ ഗൂഢാലോചന അന്വേഷിക്കണമെന്നും ഹർജി ആവശ്യപ്പെടുന്നു.  
​ആവശ്യപ്പെടുന്ന നടപടികൾ:
​ജനപ്രാതിനിധ്യ നിയമം 1950-ലെ സെക്ഷൻ 32 പ്രകാരം ഔദ്യോഗിക കൃത്യവിലോപം കാട്ടിയതിന് CEC-ക്കും മറ്റ് ഉദ്യോഗസ്ഥർക്കുമെതിരെ ക്രിമിനൽ നടപടികൾ സ്വീകരിക്കണമെന്നാണ് പ്രധാന ആവശ്യം. കൂടാതെ, ECINet, ERONet ഡാറ്റാബേസുകളുടെ സുതാര്യത പരിശോധിക്കാൻ സൈബർ സുരക്ഷാ വിദഗ്ധരുടെ സഹായത്തോടെയുള്ള പ്രത്യേക അന്വേഷണ സംഘത്തെ (SIT) നിയോഗിക്കണമെന്നും ഹർജിയിൽ ആവശ്യപ്പെടുന്നുണ്ട്. രാജ്യത്ത് ഏറെ രാഷ്ട്രീയ ചർച്ചകൾക്ക് വഴിവെച്ചിരിക്കുന്ന ഈ വിഷയം സുപ്രീം കോടതി വരും ദിവസങ്ങളിൽ പരിഗണിച്ചേക്കും.